តូក្យូ៖ រដ្ឋមន្ត្រីការបរទេសជប៉ុន លោក ហាយ៉ាស៊ី យូស៊ីម៉ាសា បានគាំទ្រចំពោះការប្រកាសសាលដីកាដាក់ពន្ធនាគារលោក ខៀវ សំផន ឱ្យជាប់ពន្ធនាគារមួយជីវិត និងបានសំដែងនូវការគោរពចំពោះអ្នកដែលបានចូលរួមក្នុងដំណើរការជម្រះក្ដីនេះ។

ក្នុងសេចក្ដីថ្លែងការណ៍បញ្ចប់ការជំនុំជម្រះក្ដីខ្មែរក្រហមចុះថ្ងៃទី២២ ខែកញ្ញានេះ លោក ហាយ៉ាស៊ី យូស៊ីម៉ាសា បានថ្លែងថា ការជំនុំជម្រះក្ដីខ្មែរក្រហម គឺជាដំណាក់កាលដ៏សំខាន់ឆ្ពោះទៅបញ្ចប់ជាស្ថាពរនូវដំណើរការស្វែងរកសន្ដិភាពនៅកម្ពុជា និងរួមចំណែកដល់ការផ្ដល់យុត្តិធម៌ និងការពង្រឹងនីតិរដ្ឋនៅក្នុងប្រទេសនេះ។

លោកថា៖ «ប្រទេសជប៉ុនសង្ឃឹមថា សារៈសំខាន់នៃការជំនុំជម្រះក្ដីនេះ នឹងត្រូវបានយល់ដឹងយ៉ាងទូលំទូលាយក្នុងចំណោមប្រជាជនកម្ពុជា ហើយក្លាយជាកេរដំណែលសម្រាប់អ្នកជំនាន់ក្រោយ និងសហគមន៍អន្តរជាតិ តាមរយៈសកម្មភាពអប់រំដែលត្រូវបានបន្ត បន្ទាប់ពីបិទបញ្ចប់ដំណើរការនីតិវិធី ហើយវានឹងរួមចំណែកដល់ការពង្រឹងនីតិរដ្ឋ»។

ជប៉ុនគឺជាម្ចាស់ជំនួយធំមួយរបស់សាលាក្ដីខ្មែរក្រហម ដែលគិតរហូតមកដល់ពេលនេះជប៉ុនបានផ្ដល់ថវិកាប្រមាណ ៨៨,៦៧លានដុល្លារអាមេរិកដល់សាលាក្ដី ដែលស្មើនឹង ៣០% នៃជំនួយរបស់អន្តរជាតិសម្រាប់ការងារសាលាក្ដីតាំងពីឆ្នាំ២០០៦មក៕